Laugardaginn 21. janúar síðastliðinn fór fram árleg hátíðardagskrá í Salnum sem tileinkuð er minningu Jóns úr Vör. Þar voru 10 grunnskólanemendur úr Kópavogi heiðraðir fyrir frumsamin ljóð sín og átti Vatnsendaskóli fjóra fulltrúa í þeim hópi. Þeir eru Anna Margrét Sverrisdóttir, Baldvin Snær Hlynsson, Steingrímur Bersi Ellingssen og Katrín Kemp Stefánsdóttir en svo skemmtilega vill til að þau eru öll nemendur í 9. Bláberjalyngi. Það var svo Katrín Kemp sem þótti standa öðrum ljóðahöfundum í grunnskólum Kópavogs fremst og hlaut hún sérstaka viðurkenningu að launum.

Haustið 2007 var ákveðið að Vatnsendaskóli yrði umhverfisvænn skóli. Um leið fór hann á græna grein hjá Landvernd með það að markmiði að flagga Granfánanum eftir tvö ár. Það markmið náðist og höfum við nú flaggað fánanum síðan haustið 2009.

Frá þeim tíma höfum við tekið fleiri skref í umhverfismálum með það að markmiði að halda Grænfánanum tvö ár í viðbót. Í desember 2011 var ljóst að því markmiði var náð og munu fulltrúar frá Landvernd því afhenda Grænfánann í annað sinn í Vatnsendaskóla fimmtudaginn 26. janúar 2012.